Genealogy de Blier

Arresto 182. Sed hoc rursum difficultatem habet, ubi diversae jurisdictiones diversis Principibus superioribus parent, utì casus se obtulit in Magno Consilio in Febr. 1734 inter N. de Blier, Advocatum Leodiensem, Appelantem à Consilio Luxemburgensi, & N. Jacques cum suis, Intimatum.

Venta erat Villa cum terris cohaerentibus unico pretio. Villa cum parte terrarum sita erat in Patria Luxemburgensi, sed major pars in territorio Leodiensi, Intimatus Retractum intentaverat coram Judice sitûs Villae, seu Du Buis, qui retrahentem ad retrahendum omnes terras admiserat, utì & Consilium Luxemburgense : Sententia verosimiliter hìc confirmata fuisset, nisi obstitisset Statutum Leodiense, quod declarat Jus Retractûs reale, & vult illud coram Judice Glebae institui; ita ut si res vendita sub diversis juridictionibus sita sit, coram singulis intentari debeat, ita ut immemoriali consuetudine, testante Mean in opere posthumo, ne quidem intentari possit coram Judice, uni res principalis sita est; sic tamen ut institui possit coram Judice superiori : quod in hoc casu non obtinebat, cùm Judices inferiores Leodienses Consilio Luxemburgensi non subsint, adeoque videbatur, stante tali Statuto, Judicem Luxemburgesem non potuisse Retrahentem admittere ad terras sitas in Patria Leodiensi.